戰力決心贏晒日本 南韓誓創4連冠霸業_東方日報

今晚上演亞運男足決賽，由東道主日本男亞足迎戰南韓男亞足，爭逐金牌。「藍武士」踏入淘汰賽表現明顯走樣，相反之前3屆均封王嘅南韓男亞足弗到漏油，今屆4戰全勝，為咗唔使服兵役實搏老命，有力反客為主，不妨捧南韓男亞足「冠軍」。（HOY 76周六晚6時30分直播）文:法達斯維

日本男亞足今屆5戰法定時間錄4勝1和，但要留意，佢哋近兩場淘汰賽表現跌Watt，8強小勝北韓男亞足1比0，射門次數比北韓更少。之後去到4強對烏茲別克男亞足，大部分時間落後1球下，直至末段才扳平，最終加時再鬥到互射12碼晉級，近期表現明顯有下滑迹象。始終「藍武士」起用U21球員，越級挑戰其餘球隊嘅U23球員，無疑較輸蝕。

摘金免服兵役實搏老命
另邊廂，由於南韓男亞足分組賽身處嘅D組僅得3隊，因此連淘汰賽佢哋今屆只係打咗4場波，確係比較着數，而且呢4場法定時間全部贏晒，共入12粒，包括4強以2比1力克防守穩健嘅中國男亞足，加上奪得金牌可免服兵役，令佢哋出戰亞運增添動力。「太極虎」唔單止曾6度奪金冠絕群雄，包括2014、2018及2022年近3屆封王，其中近兩屆都喺決賽擊敗日本男亞足，無論實力及決心更勝一籌，有力實現4連冠霸業。