2026世界盃：佔盡天時地利人和 撐墨國先破網_東方日報

三獅飄忽撐墨國先破網
上圈驚險晉級嘅英格蘭，16強將作客今屆3支主辦國之一嘅墨西哥。「三獅兵團」上場反勝剛果民主共和國可謂大話夾好彩，防線漏洞表露無遺；反觀墨西哥由揭幕戰至今，球員表現超水準，加上高海拔主場威力，英軍肯定難打，留意到墨西哥踢法急進，近8場7次先入波，撐主隊「第一隊入球」屬信心之選。（Now 618、616及馬會指定場外投注處周一早上8時直播）

海拔2,200米開戰
墨西哥係今屆3支主辦國當中實力最強1隊，佢哋今屆表現拍得住兩支爭標熱門法國同阿根廷，揭幕戰至今4戰全勝，攻入8球不失1球，祖利安基洛尼斯累積3球、魯爾占美尼斯2球，路爾斯洛慕、艾華路費度高同馬迪奧查維斯各入1球，攻力強勁兼火力分散，令對手防不勝防，今仗繼續喺海拔超過2,200米嘅墨西哥城主場出擊，佔盡天時地利人和，值得重視。

反觀星光熠熠嘅英格蘭演出反覆，分組賽先同克羅地亞上演入球騷，最終贏4比2，其後遭加納悶和，對巴拿馬亦僅贏2比0，上仗32強對剛果民主共和國幾乎出事，喺出局邊緣靠隊長哈利卡尼一個救全家驚險反勝，咁「海鮮波」嘅演出實在難令人放心。

英軍現時最大問題係後防不穩，上場對民主剛果首個失球就係右閘出現重大漏洞，但傷兵問題可能繼續焗用迪積史賓斯，墨西哥肯定會弱點攻擊，英格蘭先失守不足為奇。